55-ზე მეტი ადამიანის სიცოცხლე ემსხვერპლა კონგოს დემოკრატიულ რესპუბლიკაში ეთნიკურ ჯგუფებს შორის შეტაკებას. ამის შესახებ ინფორმაციას სააგენტო როიტერსი ავრცელებს.

როგორც ქვეყანაში მომუშავე ჰუმანიტარული მისიის წარმომადგენლები აცხადებენ, შეტაკება ტანგანიკას პროვინციაში მოხდა. ტვას ტომის წარმომადგენლები ლუბას ეთნიკურ დაჯგუფებას დაესხნენ თავს.

კონგოში ეთნიკურ ნიადაგზე კონფლიქტი მიმდინარე წლის დასაწყისში გამწვავდა. მიზეზი პრეზიდენტ ჯოზეფ კაბილას მხრიდან, საპრეზიდენტო ვადის ამოწურვის შემდეგ გადადგომაზე უარის თქმა გახდა.

გაერო-ს მონაცემებით, კონგოს დემოკრატიულ რესპუბლიკაში 2017 წლის 12 მარტიდან 19 ივნისამდე ეთნიკურ ნიადაგზე დაპირისპირებას 251 ადამიანი ემსხვერპლა, მათ შორის რვა წლამდე ასაკის 30 ბავშვი.

2016 წლის აგვისტოს შემდეგ კი, კონგოში იძულებით გადაადგილებულ პირთა რაოდენობა გაორმაგდა და 3,7 მილიონი შეადგინა.