აგვისტოს ომის მე-9 წლისთავთან დაკავშირებით, საქართველოს სამთავრობო უწყებებზე სახელმწიფო დროშები დაშვებულია.

დღეს დილით დროშები დაუშვეს მთავრობის ადმინისტრაციის, პრეზიდენტის სასახლისა და პარლამენტის შენობებზე.

ამ წუთებში საქართველოში მოქმედ ყველა ეკლესია-მონასტერში დაღუპულთა სულების მოსახსენიებელი პარაკლისები აღევლინება.

8 აგვისტო - უმძიმესი თარიღი საქართველოს უახლესი ისტორიიდან. რუსეთთან წარმოებული ხუთდღიანი ომიდან ზუსტად 9 წელი გავიდა.

9 წლის წინ ქართული სოფლების მიმართულებით სროლა ჯერ კიდევ ივლისში დაიწყო, ვითარება განსაკუთრებით 7 აგვისტოს გამწვავდა, როდესაც სოფლები ნული, ავნევი, ფრისი და დვანი დაიბომბა. მასირებულ შეტევას 7 აგვისტოს, გვიან ღამით საპასუხო ცეცხლის გახსნა მოჰყვა.

როგორც მაშინ ქართული სამშვიდობო ჯარების სარდალი აცხადებდა, დაწყებული ოპერაციის მიზანი კონსტიტუციური წესრიგის დამყარება იყო.

უკვე 8 აგვისტოს კი როკის გვირაბის გავლით საქართველოს ტერიტორიაზე, ოკუპირებული ცხინვალის რეგიონში მძიმე ტექნიკითა და ცოცხალი ძალით, საავიაციო მხარდაჭერით, რუსეთის 58-ე არმიის კოლონა შემოვიდა.

ქართულმა შენაერთებმა, რომლებმაც ცხინვალის ნაწილის დაკავება მოახერხეს, რუსული ავიაციის იერიშის შემდეგ უკან დაიხიეს. რუსულმა ავიაციამ დაბომბა ქალაქი გორი, ფოთის ნავსადგური, სენაკის და მარნეულის სამხედრო ბაზები, ვაზიანის ბაზა, საავიაციო ქარხანა და ქვიშიანის მთაზე მდებარე რადარი.

დე-ფაქტო რეჟიმების მიერ კონტროლირებადი ტერიტორიების გარდა, რუსმა სამხედროებმა ასევე დაიკავეს კოდორის ხეობა, ფოთი, ზუგდიდი, სენაკი, ახალგორი, გორის რაიონის რამდენიმე სოფელი, საჩხერის რაიონის სოფელი პერევი.

ინტენსიური საბრძოლო მოქმედებები ხუთ დღეს გაგრძელდა და ევროკავშირის თავმჯდომარე ქვეყნის-საფრანგეთის პრეზიდენტის და საერთაშორისო საზოგადოების აქტიური ჩარევის შედეგად შეწყდა.

ომის დასრულებიდან მალევე რუსეთმა აფხაზეთის და სამხრეთ ოსეთის ე.წ. დამოუკიდებლობა აღიარა.

2008 წელს გაფორმებულ ცეცხლის შეწყვეტის შეთანხმებას ოფიციალური მოსკოვი დღემდე არ ასრულებს, რის გამოც საერთაშორისო საზოგადოების კრიტიკის სამიზნედ რჩება. აგვისტოს ომს 228 მშვიდობიანი მოქალაქე, 169 ჯარისკაცი, და 14 პოლიციელი ემსხვერპლა.