საქართველოს რკინიგზის თანამშრომლები ადმინისტრაციის მხრიდან შრომითი უფლებების დარღვევებზე საუბრობენ. კერძოდ, როგორც დასაქმებულები აცხადებენ, ისინი წლებია კახეთის რეგიონულ სამსახურში მუშაობენ და მათი საცხოვრებელიც კახეთში მდებარეობს. თანამშრომლების განცხადებით, მიმდინარე წლის 1 აგვისტოს, უჩა ხვთისიაშვილი, ვახტანგ ცისკარიშვილი და აკაკი ჭარელიშვილი თბილისში დაიბარეს, სადაც განემარტათ, რომ ისინი საქმიანობას დედაქალაქში გააგრძელებდნენ და მარნეული -გარდაბნის სარკინიგზო ხაზს მოემსახურებოდნენ, რაზეც დასაქმებულებმა უარი განაცხადეს, ვინაიდან გაუჭირდებოდათ ყოველ დღე კახეთიდან თბილისში სიარული.
რკინიგზელთა ახალი პროფესიული კავშირის ცნობით, ადმინისტრაციამ, ნაცვლად დასაქმებულებთან მოლაპარაკებების გამართვისა, მათი სამსახურიდან გათავისუფლების გადაწყვეტილება მიიღო.
რკინიგზელთა პროფკავშირებში განმარტავენ, რომ სასამართლოს მას შემდეგ მიმართავენ, რაც გათავისუფლების შესახებ ოფიციალურ დოკუმენტებს მიიღებენ.
ასევე, საქართველოს რკინიგზელთა პროფკავშირი მოუწოდებს რკინიგზის ადმინისტრაციას, 7 დღის ვადაში შეცვალოს გადაწყვეტილება, წინააღმდეგ შემთხვევაში მუშები პროტესტის უკიდურეს ფორმას მიიღებენ და შიმშილობას დაიწყებენ.