მადრიდის „რეალი“ უეფა-ს სუპერთასის მფლობელი მეოთხედ გახდა. მატჩი მადრიდის „რეალსა“ და „მანჩესტერ იუნაიტედს“ შორის რამდენიმე წუთის წინ დასრულდა.

სუპერთასის ფინალი ანგარიშით 2:1 ესპანელთა სასარგებლოდ დასრულდა.

შეხვედრის პირველი გოლი 24-ე წუთზე კაზემირომ კარვახალის შესანიშნავი პასის შემდეგ გაიტანა. უპირატესობას მანამდეც მადრიდული გრანდი ფლობდა და ამ დროისათვის, ინგლისელები მეტოქის ნახევარზე გადასვლას პრაქტიკულად ვერ ახერხებდნენ.

გაშვებული გოლის შემდეგ ჟოზე მაურინიოს შეგირდებს გააქტიურება მართებდათ, თუმცა ესპანელებმა თამაშის სადავეები ხელიდან არ გაუშვეს.

ერთადერთი რეალური საგოლე მომენტი "იუნაიტედს" პირველი ტაიმის ბოლო წუთზე ჰქონდა, თუმცა ლუკაკუს თავური დარტყმის შემდეგ ბურთი პირდაპირ ნავასს მიუვიდა.

მეორე ტაიმის დასაწყისში, 52-ე წუთზე მადრიდის რეალმა მეორე გოლი გაიტანა. მეტოქის საჯარიმოში ისკომ და ბეილმა ლამაზი კომბინაცია გაითამაშეს და იერიში ისკოს ზუსტი დარტყმით დასრულდა.

ერთი გოლის გაქვითვა "მანჩესტერ იუნაიტედმა" მალევე მოახერხა. 62-ე წუთზე რეალის გოლკიპერმა კეილორ ნავასმა უხეში შეცდომა დაუშვა, რითაც კარგად ისარგებლა რომელუ ლუკაკუმ და თავისი გუნდის პირველი გოლი გაიტანა.

81-ე წუთზე უკვე რეშფორდს ჰქონდა ანგარიშის გათანაბრების შანსი, იგი მეტოქის მეკარესთან ერთი-ერთზე გავიდა, თუმცა ამჯერად ნავასმა მისი დარტმის მიმართულება გამოიცნო და რეალი გადაარჩინა.

90-ე წუთზე გუნდებმა რეალური საგოლე მომენტები გაცვალეს. ჯერ ფელაინი ურტყამდა თავით სახიფათოდ, ხოლო შემდეგ კონტრშეტევაზე ლუკას ვასკესმა ინგლისელ მცველებს თავბრუ დაახვია და ზუსტი გადაცემაც გააკეთა, თუმცა ასენსიოს დარტყმა დე ხეამ მოიგერია.