ბელგიელმა სამართალდამცველებმა ბრიუსელში, მოლენბეკის რაიონში დაკავებული მძღოლის ავტომობილში ასაფეთქებელი მოწყობილობა ვერ აღმოაჩინეს - იუწყება „როიტერი“. ინციდენტი ბრიუსელში სამშაბათს მოხდა. პოლიციამ გერმანიაში რეგისტრირებული ავტომობილის მძღოლი დევნის ოპერაციის შედეგად დააკავა. ეჭვმიტანილმა სამართალდამცველების ყურადღება მას შემდეგ მიიქცია, რაც მოძრაობის მარეგულირებელ შუქნიშანს არ დაემორჩილა და გზა განაგრძო. პოლიციამ მისი ავტომობილის მისამართით ცეცხლიც გახსნა, თუმცა სროლის შედეგად არავინ დაშავებულა.
დაკავებულმა განაცხადა, რომ ავტომობილში ასაფეთქებელი მოწყობილობა ჰქონდა დამონტაჟებული. ადგილზე მობილიზებულმა გამნაღმველებმა საეჭვო მოწყობილობა ან ნივთიერება ვერ აღმოაჩინეს. ეჭვმიტანილი, რუანდაში დაბადებული პირია, რომელიც 2009 წლამდე ბელგიაში, შემდეგ კი გერმანიაში ცხოვრობდა და ამ დრომდე სამართალდამცველების ყურადღების ქვეშ არ მოქცეულა. პოლიცია მის ფსიქიკურად გაუწონასწორებლობაზე საუბრობს. მომხდარის გამო, მოლენბეკის რაიონში დროებით დაიკეტა საავტომობილო გზები.