მასაჟისტ, ექიმ დოტის საქართველოში სტუმრობაზე მიხეილ სააკაშვილის დაცვის ყოფილი წევრი დაიკითხა. ზურაბ ჭყოიძემ, რომელიც 2009 წელს მიხეილ სააკაშვილის დაცვის წევრი იყო, საბიუჯეტო თანხების გაფლანგვის საქმეზე მასაჟისტ ექიმ დოტის საქართველოში ვიზიტზე ისაუბრა.
სასამართლო პროცესზე ჭყოიძემ განაცხადა, რომ მან უცხოელი მასაჟისტი 2009 წლის თებერვალში, სასტუმრო "კოპალაში" გაიცნო, ამ სასტუმროში ცხოვრების ხარჯები გადახდილი იყო. მოწმისვე განცხადებით, ამის შემდეგ მოხდა პრეზიდენტის სტუმრის მცხეთაში გასეირნება. ჭყოიძის განცხადებით, მას ევალებოდა ამ პირის უსაფრთხოდ გადაადგილებაზე ზრუნვა, ეს დავალება კი მისი მაშინდელი ხელმძღვანელისგან მიიღო.
სწორედ ექიმი დოტის საქართველოში ვიზიტზე იყო დღეს სასამართლო პროცესი. გამოძიება ამბობს, რომ დოტის ვიზიტის შემდეგ პრეზიდენტმა გადაწყვიტა მისი ხარჯების გასაიდუმლოება და საბიუჯეტო თანხების პირადი მოხმარებისთვის ხარჯვა. თუმცა დაცვის მხარე აცხადებს, რომ დოტის ვიზიტზე და გაწეულ ხარჯებზე არცერთ ბრალდებულს გამოძიება თანხების არამიზნობრივ ხარჯვას არ ედავება, შესაბამისად, დაცვის მხარისთვის გაუგებარია ამ მოწმის დაკითხვის მიზანი.