ფოთის ბაზრობაზე ხანძრის შედეგად დაზარალებული მოვაჭრეები ფოთის რაიონულ პროკურატურასთან შეიკრიბნენ. ისინი სამართალდამცავ ორგანოებს გამოძიების დაჩქარებას, ადგილობრივ ხელისუფლებასა და ბაზრის ადმინისტრაციას კი ერთჯერად ფინანსურ დახმარებას სთხოვენ, რათა ხელახლა შეძლონ საქმიანობის დაწყება.

როგორც დაზარალებულები აცხადებენ, კონკრეტული პასუხი ამ დრომდე არ მიუღიათ.

,,დღეს ერთი თვე შესრულდა ბაზრობაზე ხანძრის გაჩენიდან. ამ დრომდე პასუხი ვერ მივიღეთ. ვითხოვთ ჩვენი პრობლემის გულთან მიტანას და დახმარებას“, - განაცხადა ერთ- ერთმა დაზარალებულმა, მიმოზა ბახტაძემ.

ფოთის მერიაში აღნიშნულ საკითხზე კომენტარს არ აკეთებენ.

ხანძარი ფოთის ბაზრობაზე 10 ივლისს გაჩნდა. ცეცხლი დაახლოებით 2000 კვადრატულ მეტრ ფართობზე იყო გავრცელებული. სულ ხანძრის ჩაქრობას 9 სახანძრო-სამაშველო ბრიგადა ცდილობდა, მათ შორის, მეზობელი რაიონებიდან ჩამოსული სახანძროები.

ფოთის ბაზრობაზე მომხდარ ხანძართან დაკავშირებით გამოძიება სისხლის სამართლის კოდექსის 187-ე მუხლით დაიწყო, რაც ნივთის დაზიანებას ან განადგურებას გულისხმობს.