ამერიკის შეერთებული შტატების პრეზიდენტი ჩრდილოეთ კორეის ლიდერს აფრთხილებს, რომ კუნძულ გუამიზე თავდასხმის შემთხვევაში, ჩრდილოეთ კორეაში ისეთი მოვლენები განვითარდება, როგორიც ჯერ არავის უნახავს - იუწყება BBC. დონალდ ტრამპის თქმით, ჩრდილოეთ კორეის ლიდერი უპატივცემულოდ მოიხსენიებს შეერთებულ შტატებს, კიმ ჩენ ინსაც და მის ოჯახსაც დიდი ხნის განმავლობაში გასდიოდათ ყველაფერი, თუმცა ეს მისი პრეზიდენტობის პირობებში აღარ გამოვა.
მოგვიანებით, პენტაგონის ხელმძღვანელმა, ჯეიმს მეტისმა განაცხადა, რომ აშშ მზად არის და ვალდებულია, ჰქონდეს საკითხის სამხედრო გზით გადაჭრის ვარიანტები, თუმცა მას კატასტროფული შედეგები მოჰყვება, ამიტომ ქვეყანა პრობლემის დიპლომატიური გზით მოგვარების მომხრეა.
ცოტა ხნის წინ, ჩრდილოეთ კორეას „მსოფლიოსთვის ჯერ არნახული ცეცხლითა და მრისხანებით“ დაემუქრა ამერიკის შეერთებული შტატების პრეზიდენტი დონალდ ტრამპი, იმ შემთხვევაში, თუ ფხენიანის ქმედებები ამერიკის ან შორეული აღმოსავლეთის რეგიონის უსაფრთხოებას რისკის ქვეშ დააყენებს.
დონალდ ტრამპის განცხადება „ვაშინგტონ პოსტის“ სტატიას მოჰყვა, სადაც სადაზვერვო სამსახურის ანონიმურ წყაროზე დაყრდნობით ეწერა, რომ ფხენიანს პირველად აქვს შესაძლებლობა, ბირთვული ქობინები აწარმოოს და ბალისტიკურ რაკეტებში დაამონტაჟოს.
ფხენიანმა ამერიკის შეერთებული შტატების პრეზიდენტის მუქარას მუქარითვე უპასუხა და წყნარ ოკეანეში, კუნძულ გუამიზე განთავსებულ ამერიკულ სამხედრო ბაზებზე სარაკეტო დარტყმის განხორციელებას დაჰპირდა.