რუსულმა საოკუპაციო ძალებმა საქართველოს კიდევ ერთი მოქალაქე გაიტაცეს. სოფელ ტყაიას მკვიდრი თენგიზ მიქავა მდინარე ენგურზე თევზაობდა, როდესაც ის იარაღის მუქარით რუსმა ჯარისკაცებმა ენგურის მეორე ნაპირზე გადაიყვანეს.
ფაქტს სახელმწიფო უსაფრთხოების სამსახურში ადასტურებენ. თენგიზ მიქავას მეუღლის ლალი ჭკადუას თქმით, გატაცების შესახებ მან გალში მცხოვრები ნათესავებისგან შეიტყო.
ე.წ. აფხაზური ხელისუფლებიდან ოჯახს არავინ დაკავშირებია. მისივე ინფორმაციით, მიქავა გალის იზოლატორშია გადაყვანილი. ზუგდიდის რაიონის სოფელი ტყაია ოკუპირებული გალის რაიონის სოფელ საბერიოს ესაზღვრება.
რუსეთის აგრესიული პოლიტიკის გამოვლინებად აფასებენ საოკუპაციო ძალების უკანონო მოქმედებებს მმართველი გუნდის წევრები.
პარლამენტის ვიცე-სპიკერის განცხადებით, ჩრდილოვანი მმართველი და მისი პოლიტიკა არა მხოლოდ საქართველოს, არამედ მსოფლიოსაც უპირისპირდება.
გია ვოლსკი საქართველოს ხელისუფლების სტრატეგიას რაციონალურად აფასებს და აცხადებს, რომ ეს გეგმა ქვეყანას გამარჯვებამდე მიიყვანს.