თბილისში, „ლოკომოტივის“ სტადიონზე გულშემატკივრებს შორის ფიზიკური დაპირისპირება მოხდა. ერთმანეთს ქუთაისის „ტორპედოსა“ და თბილისის „ლოკომოტივის“ გულშემატკივრები დაუპირისპირდნენ .
სამართალდამცავებმა მოახერხეს და „ტორპედოს“ გულშემატკივრები სტადიონიდან გაიყვანეს, რის შემდეგაც ვითარება განიმუხტა.
გულშემატკივრებს შორის ფიზიკური დაპირისპირების გამო, მატჩი შეწყვეტილია. ამ დროის მონაცემებით, „ლოკომოტივი“ ანგარიშით 2:0 ამარცხებს ქუთაისის „ტორპედოს“.
აღნიშნული მატჩი დაწყებიდან რამდენიმე წუთშიც შეჩერდა, ვინაიდან გულშემატკივრებმა ტრიბუნებიდან მოედანის მიმართულებით ფეთქებადი მაშხალა ისროლეს. მატჩის მიწურულს ერთ-ერთმა გულშემატკივარმა კიდევ ერთხელ ისროლა მაშხალა, რასაც მატჩის ჩაშლა და ფიზიკური დაპირისპირება მოჰყვა.
დადგება თუ არა დღის წესრიგში მატჩის ხელახლა ჩატარების საკითხი და დაჯარიმდება თუ არა მომხდარის გამო რომელიმე კლუბი, აღნიშნულ საკითხზე ფეხბურთის ფედერაციის სადისციპლინო კომიტეტი იმსჯელებს.