საქართველოს პარლამენტის წევრის ირაკლი ხახუბიას შვილის, ბექა ხახუბიას ავტოავარიაში დაღუპვის საქმეზე ბრალდებულ პოლიციელებს 1000-1000 ლარიანი გირაო შეუფარდეს.
გორის რაიონულ სასამართლოში აღკვეთის ღონისძიებასთან დაკავშირებულ პროცესზე პროკურატურამ ხუთ-ხუთი ათას ლარიანი გირაოს შუამდგომლობა დააყენა, თუმცა მოსამართლემ დაცვის მხარის შუამდგომლობა გაითვალისწინა და სამივე პოლიციელს 1000-ლარიანი გირაო შეუფარდა.
გარდა ამისა, დაკმაყოფილდა პროკურატურის კიდევ ერთი მოთხოვნა, კერძოდ ბრალდებულების სამსახურიდან დათხოვნის შესახებ.
როგორც პირველ არხს ერთ-ერთი ბრალდებულის, შიდა ქართლის პოლიციის ასმეთაურის, ნუკრი ხაბელაშვილის ადვოკატმა განუცხადა, არცერთი ბრალდებული ბრალს არ აღიარებს. ამასთან, თამარ აბესაძის თქმით, ყველა ბრალდებულს სამსახურებრივი უფლებამოსილება შეუჩერდა. ადვოკატის მტკიცებით, ბექა ხახუბიასთვის, რომელიც პატრულს არ დაემორჩილა, პოლიციელებს გზა არ ჩაუხერგავთ.
"ტრაილერი გორის გვირაბთან მართლაც იყო გაჩერებული, თუმცა ეს არ იყო გზის ჩახერგვა - ეს იყო შეზღუდვა, რადგან დატოვებული იყო 3 - მეტრიანი გასავლელი. არსებობს ვიდეომასალები, რომლებიც ამას ცხადყოფს", - განაცხადა თამარ აბესაძემ.
მისი თქმით, ბრალდებული პოლიციელების წინასასამართლო სხდომა გორის სასამართლოში 2 ოქტომბერს ჩატარდება. უკვე ყოფილ პოლიციელებს ნუკრი ხაბელაშვილს, გიორგი სადაღაშვილს და ზურაბ რუსიშვილს ბრალი სსსკ-ის 116- ე და 333-ე მუხლებით წარედგინათ, რაც გაუფრთხილებლობით სიცოცხლის მოსპობას და სამსახურებრივი უფლებამოსილების გადამეტებას გულისხმობს.
ძლიერი შეჯახების შედეგად, გორში, მაგისტრალზე ბექა ხახუბია 17 მაისს გარდაიცვალა.