საქართველოს ეროვნული ლიგის 22-ე ტურში თბილისის „ლოკომოტივისა“ და ქუთაისის „ტორპედოს“ შეხვედრა 85-ე წუთზე შეწყდა.

თბილისში, მიხეილ მესხის სახელობის სტადიონზე გამართული შეხვედრის ჩაშლის მიზეზი მეტოქე გუნდების გულშემატკივართა ფიზიკური დაპირისპირება გახდა. თუმცა, მანამდე მთავარმა არბიტრმა გიორგი ყრუაშვილმა თამაში ორჯერ შეაჩერა, რადგან ტრიბუნებიდან მოედანზე მაშხალები ისროლეს.

სამართალდამცავებმა „ტორპედოს“ გულშემატკივრები სტადიონიდან გაიყვანეს და ვითარება განიმუხტა. თუმცა, თამაში აღარ განახლებულა. თამაშის შეწყვეტამდე „ლოკომოტივი“ 2:0 იგებდა.

რომელი მხარე დაჯარიმდება მომხდარის გამო, ამაზე ფეხბურთის ფედერაციის სადისციპლინო კომიტეტი უახლოეს დღეებში იმსჯელებს.

ფეხბურთის ფედერაციასა და ქუთაისის “ტორპედოში” ჯერ-ჯერობით კომენტარს არ აკეთებენ. თბილისის „ლოკომოტივმა“ კი განცხადება გაავრცელა.

„მატჩის შეწყვეტის შესახებ გადაწყვეტილება მთავარმა არბიტრმა გიორგი ყრუაშვილმა მას შემდეგ მიიღო, რაც სტადიონის ტრიბუნაზე გულშემატკივარს შორის დაპირისპირება მოხდა. მატჩის შედეგისა და სანქციების შესახებ საქართველოს ფეხბურთის ფედერაციის სადიციპლინო კომიტეტი უახლოეს დღეებში იმსჯელებს“ - წერია საფეხბურთო კლუბ "ლოკომოტივის" განცხადებაში.