სამტრედიაში, საფეხბურთო მოედანზე ინციდენტი მოხდა, სადაც „სამტრედია“ და თბილისის „დინამო“ შეხვდნენ ერთმანეთს. ანგარიში ფრედ 1-1 დასრულდა, რამაც „სამტრედიის“ გულშემატკივართა უკმაყოფილება გამოიწვია. ერთ-ერთმა მათგანმა ტრიბუნიდან ბოთლი მსაჯების მიმართულებით ისროლა. პოლიციის თანამშრომლებმა კი, აღნიშნული პირი პოლიციის განყოფილებაში გადაიყვანეს.

თამაშის პირველი ნაწილი ფრედ 0-0 დასრულდა, ხოლო მეორე ტაიმში ანგარიში ჯერ სტუმრებმა გახსნეს, თამაშის ბოლო წუთებზე კი, მასპინძლებმა ანგარიშის გათანაბრება შეძლეს.

როგორც შსს-ში აცხადებენ, მოხდა სიტყვიერი შელაპარაკება, რაც სამართალდამცველთა ჩარევით აღიკვეთა. საქმის ძიება ადმინისტრაციული სამართალწარმოებით, ადმინისტრაციული კოდექსის 166-ე მუხლით მიმდინარეობს, რაც წვრილმან ხულიგნობას გულისხმობს.

ფეხბურთის ფედერაციის სადისციპლინო კოლეგია სამტრედიაში მომხდარ ინციდენტზე, სავარაუდოდ, რამდენიმე დღეში იმსჯელებს.