ულტრანაციონალისტურ აქციებს ვირჯინიაში მსხვერპლი მოჰყვა, ათობით ადამიანი დაშავდა
ვირჯინიის ქალაქ შარლოტსვილში ულტრანაციონალისტების მიერ გამართული აქცია შეტაკებებში გადაიზარდა, რასაც მსხვერპლი მოჰყვა.
გვიან ღამით მომიტინგეების მასაში ავტომობილი შევარდა, რის შედეგადაც ერთი ადამიანი დაიღუპა, ათობით დაშავდა. ეჭვმიტანილი დაკავებულია. საქმეს ამერიკის შეერთებული შტატების საგამოძიებო ფედერალური ბიურო იძიებს.
ულტრამემარჯვენეები აქციას ორი დღეა, მართავენ. მათ პოლიციაზე იერიში მიიტანეს, რასაც სამართალდამცველებმა წყლის ჭავლით უპასუხეს. შარლოტსვილის მერმა ულტრამემარჯვენე დემონსტრანტებს დაშლისკენ მოუწოდა.
ვირჯინიაში მომხდარ ინციდენტს პრეზიდენტი დონალდ ტრამპი გამოეხმაურა.
მისი თქმით, ამერიკის შეერთებულ შტატებში ეთნიკური ნიშნით სიძულვილის ადგილი არ არის.
„მე ვესაუბრე ვირჯინიის შტატის გუბერნატორს. ჩვენ მომხდარი ძალიან გვაწუხებს. მოვუწოდებ დემონსტრანტებს, შეწყვიტონ აქციები, რომელიც შუღლს, სიძულვილს და რასიზმს აღვივებს.“ - განაცხადა დონალდ ტრამპმა.