დარიალის ხეობაში ისევ სტიქიის საფრთხეა.
ამალი-დევდორაკის ხეობაში მყინვარის ინტენსიური დნობის შედეგად ღვარცოფული ნაკადია წარმოქმნილი.
ადგილზე დამონტაჟებული სისტემით, განგაშის სიგნალის მიღების შემდეგ პრევენციული ზომებია მიღებული. დროებით დახურულია ლარსის საბაჟო-გამშვები პუნქტი.
რამდენიმე საათის განმავლობაში სტეფანწმინდა-ლარსის ერთ-ერთ მონაკვეთზე სატრანსპორტო მოძრაობაც აკრძალული იყო, გზა ამ დროისთვის გახსნილია.
საგანგებო სიტუაციის გამო, შემთხვევის ადგილზე გარემოს ეროვნული სააგენტოს სპეციალისტები ჩავიდნენ, რომლებიც სტიქიურ მოვლენებს დააკვირდებიან, მოსალოდნელი საფრთხის მასშტაბს განსაზღვრავენ და დასკვნას მოამზადებენ.
ეს დევდორაკის მყინვარზე ღვარცოფული პროცესების გააქტიურების პირველი შემთხვევა არ არის. 2014 წლის მაისსა და აგვისტოში და 2016 წლის ივნისში დატრიალებულმა ტრაგედიამ ადამიანების სიცოცხლე იმსხვერპლა.