დაძაბულობის ზრდის მიუხედავად, ჩრდილოეთ კორეასთან ბირთვული ომის უშუალო საფრთხე არ არსებობს, - ამის შესახებ აშშ-ის ცენტრალური სადაზვერვო სააგენტოს დირექტორმა მაიკ პომპეომ Fox News-თან ინტერვიუში განაცხადა.

ამავე დროს, პომპეომ აღნიშნა, რომ ფხენიანის შეიარაღების პროგრამის განვითარების ტემპი სულ უფრო მეტ შეშფოთებას იწვევს.

„მე მოვისმინე მსჯელობები იმის შესახებ, რომ ჩვენ ბირთვული ომის ზღვარზე ვარ. მე პირადად არ მინახავს ისეთი სადაზვერვო მონაცემები, რომლებიც მიუთითებდა, რომ დღეს ასეთ მდგომარეობაში ვართ“, - აღნიშნა პომპეომ.

ცენტრალური სადაზვერვო სააგენტოს ხელმძღვანელის განცხადებით, ფხენიანის სარაკეტო და ბირთვულ ძალისხმევასთან დაკავშირებით, ვაშინგტონის სტრატეგიული მოთმინება დასრულებულია.

კითხვაზე, რამდენად ახლოსაა ჩრდილოეთ კორეა ისეთი ბირთვული იარაღის შექმნასთან, რომელიც აშშ-ის ტერიტორიას მიწვდება, პომპეომ უპასუხა, რომ „ახლა ისინი უფრო ახლოს არიან“.

გასულ კვირას აშშ-ის პრეზიდენტმა დონალდ ტრამპმა განაცხადა, რომ მზად არის ფხენიანის სარაკეტო პროგრამას „ცეცხლითა და მრისხანებით“ უპასუხოს. თავის მხრივ, ჩრდილოეთ კორეამ წყნარ ოკეანეში მდებარე კუნძულ გუამზე სარაკეტო დარტყმის გეგმა გამოაქვეყნა.