ინდოეთის ხელისუფლებამ უტარ-პრადეშის შტატის საავადმყოფოში 30 ბავშვის გარდაცვალებასთან დაკავშირებით გამოძიება დაიწყო.
ქვეყნის ჩრდილოეთ ნაწილში, ქალაქ გორახპურის საავადმყოფოში ბოლო ხუთი დღის განმავლობაში 63 ადამიანი დაიღუპა, მათ შორის 30 ბავშვი.
ადგილობრივი მედიის ინფორმაციით, ბავშვების გარდაცვალების მიზეზი ჟანგბადის უკმარისობა გახდა. დაუდასტურებელი ინფორმაციით, პალატებს რამდენიმე საათის გამავლობაში ჟანგბადი არ მიეწოდებოდა. გარდაცვლილთა შორის ბევრი ახალშობილი იყო.
საავადმყოფოს ადმინისტრაცია კი აცხადებს, რომ ბავშვების გარდაცვალების მიზეზი ენცეფალიტი გახდა.
სამედიცინო დაწესებულება ინდოეთის ერთ-ერთ ყველაზე ღარიბ რეგიონში მდებარეობს. უტარ-პრადეშის შტატში ყოველწლიურად ბავშვთა მაღალი სიკვდილიანობა ფიქსირდება სხვადასხვა დაავადების მათ შორის ენცეფალიტის გამო.