რასიზმი ბოროტებაა - ასე გამოეხმაურა აშშ-ის პრეზიდენტი დონალდ ტრამპი ქალაქ შარლოტსვილში ნაციონალისტების მიერ გამართულ აქციას.
ტრამპის თქმით, ქვეყნის სამართალდამცავი ორგანოები არ დაიშურებენ რესურსს აშშ-ის მოქალაქეების დასაცავად. მისი განცხადებით, ისინი, ვინც შეუწყნარებლობის ნიადაგზე ძალადობის აქტებს სჩადიან, პასუხისმგებლობას ვერ გაექცევიან.
„რასიზმი ბოროტებაა, ხოლო ისინი, ვინც სჩადიან ბოროტებას მისი სახელით, - კრიმინალები და ბოროტმოქმედები, მათ შორის კუ-კლუქს-კლანი, ნეონაცისტები, თეთრი რასის აღმატებულობის იდეის მომხრეები და სხვა დაჯგუფებები, რომლებიც სიძულვილს აღვივებენ, ეწინააღმდეგებიან ყველაფერს, რაც ამერიკელებისთვის ძვირფასია“, - განაცხადა შვებულებიდან თეთრ სახლი ნაადრევად დაბრუნებულმა დონალდ ტრამპმა სპეციალური მიმართვისას.
„ჩვენ ვგმობთ სიძულვილის, შეუწყნარებლობისა და ძალადობის ამ გამოვლინებას. ამის ადგილი ამერიკაში არ არის“, - განაცხადა აშშ-ის პრეზიდენტმა.
გასული კვირის ბოლოს ვირჯინიის შტატის ქალაქ შარლოტსვილში ნაციონალისტების აქცია გაიმართა. ისინი ადგილობრივი ხელისუფლების მიერ აშშ-ის სამოქალაქო ომის მონაწილის, გენერალ რობერტ ლის ძეგლის დემონტაჟის გეგმას აპროტესტებდნენ.
ულტრამემარჯვენეების მარშმა ანტიფაშისტების და სხვა მემარცხენე დაჯგუფებების აქტივისტების კონტრაქციები გამოიწვია, რასაც არეულობა მოყვა. ხელისუფლებამ შარლოტსვილში საგანგებო მდგომარეობა გამოაცხადა.
ამასთან, ავტომობილი შევარდა ნაციონალისტების მოწინააღმდეგე საპროტესტო აქციის მონაწილეებში, რის შედეგადაც დაიღუპა ერთი და დაშავდა 19 ადამიანი.