მეორე მსოფლიო ომის დროს გერმანიაში ტყვედ ნამყოფი ყოფილი საბჭოთა ჯარისკაცები ერთჯერად კომპენსაციას მიიღებენ.
გერმანიის ფინანსთა ფედერალური სამინისტროს დირექტივის მიხედვით, იმ ჯარისკაცებს, რომლებიც 22.06.1941-08.05.1945 წლებში გერმანიაში ტყვედ ჩავარდნენ და დღემდე ცოცხლები არიან, გერმანიის მთავრობა ერთჯერადად 2500 ევროს ოდენობით დაეხმარება.
შემწეობა შესაბამისი განაცხადის საფუძველზე გაიცემა, ვეტერანთა საქმეების სახელმწიფო სამსახურში განმარტავენ, რომ შესაბამის პირებზე ინფორმაციის მოკვლევა დაწყებულია და ამჟამად 10 მათგანია ნაპოვნი.
დახმარების პოტენციური ადრესატების შესახებ გერმანიისთვის ინფორმაციის მიწოდების საშუალება ქართულ მხარეს 2017 წლის 30 სექტემბრამდე აქვს. გერმანიის ფინანსთა ფედერალური სამინისტროს მიერ გამოგზავნილ წერილში განმარტებულია, რომ ერთჯერადი შემწეობა არ გაიცემა მესამე პირზე, ასევე დაუშვებელია მისი მემკვიდრეობით გადაცემა.
დირექტივის მიხედვით, განაცხადის დაყენება მხოლოდ თავად, დაზარალებულს ან შესაბამისი უფლებამოსილებით აღჭურვილ პირს შეუძლია.ბენეფიციარებს შუამდგომლობას ვეტერანთა საქმის სახელმწიფო სამსახური გაუწევს.
ყოფილ საბჭოთა ტყვეებზე აღნიშნული გადაწყვეტილება გერმანიის ფინანსთა ფედერალურმა სამინისტრომ 2015 წლის 30 სექტემბერს მიიღო, თუმცა ქართულ მხარეს, კერძოდ ჯანდაცვის სამინისტროს, წერილი მიმდინარე წლის მარტში ჩაბარდა, ხოლო ვეტერანთა საქმის სახელმწიფო სამსახურმა დირექტივა ორი კვირის წინ მიიღო.