თბილისის ბიუჯეტი მილიონ ნახევარი ლარით იზრდება, - ეს განცხადება დედაქალაქის საკრებულოში უმრავლესობის ერთ-ერთმა ლიდერმა ჯაბა სამუშიამ საკრებულოს სხდომის დაწყებამდე გააკეთა. სამუშიას თქმით, მთლიანობაში ბიუჯეტის ასიგნებები 826 მილიონს შეადგენს.

„ბიუჯეტში შესატანი ცვლილებებით თბილისის მერიის სარეზერვო ფონდს 500 მილიონი ლარი ემატება და ეს თანხა 2015 წლის სტიქიით დაზარალებულთა მეორე კატეგორიის რამდენიმე ოჯახის დასაფინანსებლად გამოიყოფა. იქ გარკვეული სამართლებრივი პრობლემები იყო, რომელიც უკვე მოგვარდა. ამასთანავე სხვა ინფრასტრუქტურული პროექტებია დაგეგმილი. რაიონულ გამგეობებს საგზაო ინფრასტრუქტურის მოსაწყობად თანხები ემატება. ეს თანხები მიმართულია იმ საჭიროებისათვის, რომელიც თბილისელებს სჭირდებათ“,- განაცხადა სამუშიამ.

მისივე თქმით, ამის გარდა დღევანდელ სხდომაზე რამოდენიმე მნიშვნელვანი საკითხი გადის.

„ცალკე მინდა გამოვყო კოოპერატიული ბინათმშენებლობით დაზარალებულთა საკითხი. თბილისის საკრებულოში სამი ასეთი პრობლემური საკითხი იყო შემოსული. პროცესი, რომელიც კოოპერატიული ბინათმშენებლობით დაზარალებულთა დაკმაყოფილების თვალსაზრისით დავიწყეთ კვლავ გრძელდება", - აღნიშნა სამუშიამ.

ამ წუთებში საკრებულოს სხდომაზე თბილისის ბიუჯეტის ცვლილებების პროექტს განიხილავენ. წინასწარარი ინფორმაციით, დოკუმენტს საკრებულოს ოპოზიცია მხარს არ დაუჭერს.