პეკინის ქუჩაზე, მარცხენა მხარეს ყველა მიწისქვეშა კომუნიკაცია კვირის ბოლომდე მოწესრიგდება, რის შემდეგაც გზის საფარის პირველი ფენის დაგება დაიწყება, - ამის შესახებ დედაქალაქის მერმა დავით ნარმანიამ განაცხადა. მან პეკინის სარეაბილიტაციო შტაბში მორიგი შეხვედრა გამართა. ნარმანიამ შესაბამისი სამსახურების წარმომადგენლებთან ერთად, მიმდინარე სამუშაოებთან დაკავშირებული თემები განიხილა და გადაწყვეტილებები მიიღო.
„ბოლო პერიოდის მდგომარეობით, ამ კვირის ბოლომდე მთავრდება მარცხენა მხარეს ყველა მიწისქვეშა კომუნიკაციის მოწესრიგება, რომლის შემდეგაც კონტრაქტორი კომპანია დაიწყებს გზის საფარის პირველი ფენის დაგების სამუშაოებს.
პარალელურად, გაგრძელდება ტროტუარზე მიმდინარე სამუშაოები. დღეის მდგომარეობითაც გეგმა-გრაფიკთან მიმართებაში ჩამორჩენა არ გვაქვს და შესაბამისად, ყველა ორგანიზაცია მუშაობს მაქსიმალურად კოორდინირებულად, რათა სამუშაოები გეგმა-გრაფიკით გათვალისწინებულ ვადებში დავამთავროთ“,- განაცხადა დავით ნარმანიამ.