აშშ-ის სახელმწიფო დეპარტამენტმა მსოფლიოში რელიგიის თავისუფლების მდგომარეობის შესახებ ანგარიში გამოაქვეყნა.

სახელმწიფო დეპარტამენტის ოფიციალურ ვებგვერდზე გამოქვეყნებულ დოკუმენტში ერთი თავი საქართველოს ეძღვნება.

"საქართველოს კონსტიტუცია უზრუნველყოფს „რელიგიის სრულ თავისუფლებას“, „ეკლესიისა და სახელმწიფოს გამიჯვნას და თანასწორუფლებიანობას მრწამსის მიუხედავად. ის კრძალავს დევნას რელიგიურ ნიადაგზე. კანონი და პოლიტიკა ანიჭებს ქართულ მართლმადიდებლურ ეკლესიას პრივილეგიებს, რომლებითაც არ სარგებლობენ სხვა რელიგიური ჯგუფები, მათ შორის ქართული მართლმადიდებლური ეკლესიის პატრიარქისთვის სამართლებრივი დევნისგან იმუნიტეტი და საკონსულტაციო როლს განათლებაში. ბოლო ერთი წლის განმავლობაში, მთავრობამ გამოიძია 19 საქმე, რომელიც უკავშირდებოდა რელიგიური შეუწყნარებლობის ნიადაგზე დანაშაულს. არასამთავრობო ორგანიზაციები და სახალხო დამცველის ოფისი იტყობინებიან, რომ რელიგიური სიძულვილით მოტივირებული ეფექტიანი გამოძიების ნაკლებობა კვლავ მთავარ პრობლემად რჩება“, - ნათქვამია ანგარიშში.

დოკუმენტში ნათქვამია, რომ მთავრობამ განაცხადა შეიარაღებული ძალების მუსლიმი წევრებისთვის პირველი სამლოცველოს გახსნის შესახებ, თუმცა საპატიმროებში სამლოცველოები მხოლოდ ქართულ მართლმადიდებლური ეკლესიას აქვს. ამავე დროს, ანგარიშში აღნიშნულია, რომ რელიგიური დანიშნულების ობიექტების მშენებლობისას რელიგიური უმცირესობა კვლავ აწყდება მთავრობის წინააღმდეგობას, როგორც ნაციონალურ, ისე ადგილობრივ დონეზე. აქვე მოყვანილია რუსთავისა და ბათუმის მაგალითები, სადაც ადგილობრივმა სასამართლოებმა რელიგიური უმცირესობების ობიექტების მშენებლობის სასარგებლოდ მიიღეს გადაწყვეტილება.

დოკუმენტში ასევე წერია, რომ არასამთავრობო ორგანიზაციები და რელიგიური უმცირესობები შეშფოთებას გამოთქვამენ იმის გამო, რომ საბჭოთა პერიოდში სახელმწიფოს მიერ ჩამორთმეული შენობების დაბრუნების პროცესში უპირატესობით ქართული მართლმადიდებლური ეკლესია სარგებლობს, ასევე ამბობენ, რომ მთავრობა აგრძელებს არაადეკვატურ რეაგირებას ქართული მართლმადიდებელი ეკლესიის სასარგებლოდ საჯარო სკოლებში რელიგიური შეუწყნარებლობის და დისკრიმინაციის აქტებზე.

დოკუმენტში საქართველოში რელიგიური უმცირესობების წარმომადგენლების წინააღმდეგ ძალადობის ფაქტებზეც არის საუბარი, კერძოდ იეჰოვას მოწმეები აცხადებენ, რომ მათ წევრებზე ფიზიკური თავდასხმა 11-ჯერ განხორციელდა.

ანგარიშის თანახმად, საქართველოში აშშ-ის ელჩი და საელჩოს თანამშრომლები რეგულარულად ხვდებიან მთავრობის წარმომადგენლებს, მათ შორის რელიგიის საკითხთა სახელმწიფო სააგენტოს ხელმძღვანელობას, ადამიანის უფლებათა და გენდერული თანასწორობის საკითხებში პრემიერ-მინისტრის მრჩეველს, პრეზიდენტის მრჩეველს უმცირესობათა საკითხებში, რომ ხელი შეუწყონ დიალოგს მთავრობასა და რელიგიურ უმცირესობებს შორის. თებერვალსა და ნოემბერში ელჩი შეხვდა ქართული მართლმადიდებლური ეკლესიის პატრიარქს, რომ ხაზი გაესვა ქართული მართლმადიდებლური ეკლესიის როლს რელიგიური მრავალფეროვნებისა და ტოლერანტობის მხარდაჭერაში. ამასთან, ელჩი და საელჩოს თანამშრომლები მოგზაურობენ ქვეყანაში და ხვდებიან რელიგიური უმცირესობის ჯგუფებს.