“თეთრი ხმაურის მოძრაობის“ აქტივისტის ბექა წიქარიშვილის საქმეზე მოსამართლემ გადაწყვეტილება შესაძლოა, დღეს გამოაცხადოს. დაცვის მხარე დასკვნით სიტყვას იტყვის, რის შემდეგაც მოსამართლე გადაწყვეტილების გამოსატანად სათათბიროდ გავა. განაჩენი შესაძლოა დღესვე გამოცხადდეს, ან მხარეებს კონკრეტული თარიღი ეცნობებათ.

„თეთრი ხმაურის მოძრაობის“ წევრი ბექა წიქარიშვილი და მისი ინტერესების დამცველები იმედოვნებენ, რომ მოსამართლე განაჩენის გამოცხადებისას წიქარისვილს რაიმე ტიპის სანქციებს არ დააკისრებს. მუხლი, რომლითაც ბექა წიქარიშვილი დააკავეს -70 გრამამდე მარიხუანის მოხმარებისთვის, საკონსტიტუციო სასამართლოს გადაწყვეტილების შემდეგ სასჯელის სახედ პატიმრობას აღარ ითვალისწინებს და ამჟამად მოქმედი რედაქციით, სანქციის სახით გათვალისწინებულია ჯარიმა ან საზოგადოებისთვის სასარგებლო შრომის დაწესება.

ადვოკატის განცხადებით, წიქარიშვილი მარიხუანის მოხმარების ფაქტს ადასტურებს, თუმცა განაჩენის გამოცხადებისას მოსამართლემ მას ჯარიმა ან საზოგადოებისთვის სასარგებლო შრომის სანქცია არ უნდა დააკისროს, რადგან საკონსტიტუციომ გააუქმა ამ მუხლზე პატიმრობა და ეს მუხლი გარკვეული პერიოდი არავითარ სანქციებს აღარ ითვალისწინებდა, თუმცა შემდეგ ჯარიმა დაწესდა ამ მუხლის დარღვევაზე.

ნარკოდანაშაულისთვის ბექა წიქარიშვილი 2013 წელს დააკავეს და ის ათი ათას ლარიანი გირაოთი გაათავისუფლეს. მას შემდეგ წიქარიშვილმა საკონსტიტუციო სასამართლოში გაასაჩივრა კანონის ის მუხლი, რომელიც 70 გრამამდე გამომშრალი მარიხუანის პირადი მოხმარებისთვის პატიმრობას ითვალისწინებდა. 2015 წელს საკონსტიტუციომ პატიმრობის სასჯელი გააუქმა და კანონშიც აისახა, რომ 70 გრამამდე გამომშრალი მარიხუანის პირადი მოხმარებაზე პატიმრობა გაუქმდეს. გარკვეული პერიოდის შემდეგ კი სანქციის სახით ამ მუხლის დარღვევისთვის ჯარიმა დაწესდა.