ბექა წიქარიშვილის საქმეზე მოსამართლე განაჩენს 30 აგვისტოს გამოაცხადებს. დღევანდელ პროცესზე დაცვის მხარის და ბრალდებულ ბექა წიქარიშვილის დასკვნითი სიტყვა მოისმინეს.

ბრალდებული, რომელიც წარდგენილ ბრალდებას 70 გრამამდე მარიხუანის პირადი მოხმარებისთვის შენახვას აღიარებს, აცხადებს, რომ მოქმედი კანონით მოსამართლე მას დამნაშავედ გამოაცხადებს, თუმცა წიქარიშვილიც და მისი ინტერესების დამცველებიც აცხადებენ, რომ გამამტყუნებელი განაჩენის შემთხვევაშიც, წიქარიშვილს რაიმე ტიპის სანქციები არ უნდა დაეკისროს.

ამის საფუძვლად ისინი საკონსტიტუციო სასამართლოს 2015 წლის გადაწყვეტილებას ასახელებენ, რომლითაც წიქარიშვილის სარჩელის საფუძველზე 70 გრამამდე მშრალი მარიხუანის პირადი მოხმარებისთვის შენახვაზე პატიმრობა გაუქმდა და სანქციები აღარ არსებობდა, თუმცა ერთი თვის წინ კანონში შეტანილი ცვლილებებით, სანქციად ჯარიმა განისაზღვრა.

ბრალდება ითხოვს წიქარიშვილი გამტყუნდეს ნარკოდანაშაულში, თუმცა რაც შეეხება სასჯელის ზომას, პროკურორის თქმით, მოქმედი კანონით ბრალდებას არა აქვს უფლება მოითხოვოს თუ რა ტიპის სასჯელი შეეფარდოს ბრალდებულს.

ბექა წიქარიშვილი ნარკოდანაშაულის ბრალდებით 2013 წელს დააკავეს. ის 10 000 ლარიანი გირაოთი გაათავისუფლეს.