მომავალი წლიდან ელექტროენერგიის სამომხმარებლო ტარიფი, შესაძლოა, შემცირდეს.
მოსალოდნელი ცვლილება თბოსადგურების სატარიფო კომპონენტს ეხება. ლართან მიმართებაში დოლარის კურსის კლების გამო, მარეგულირებელმა კომისიამ დადგენილი პროცედურით რამდენიმე განაცხადი უნდა განიხილოს, რომლებიც ოპერატორმა კომპანიებმა უკვე წარადგინეს.
თბოსადგურებს ბუნებრივი აირის შესასყიდი ხარჯები გამოუთავისუფლდათ და საწარმოო ტარიფების გადახედვას საკუთარი ინიციატივითვე ითხოვენ.
„ჯი-ფაუერის“, „საქართველოს საერთაშორისო ენერგეტიკული კორპორაციის”, „მტკვარი ენერჯისა“ და „გარდაბნის თბოსადგურის“ კომპონენტებში ცვლილებას მარეგულირებელი კომისია, სავარაუდოდ, 2 თვეში დაამტკიცებს. თუმცა, ამ ეტაპზე უცნობია, იქონიებს თუ არა თბოსადგურების ტარიფების კლება გავლენას ელექტროენერგიის სამომხმარებლო ფასების სამომავლო განაკვეთებზე.
2018 წლისთვის ახალ სატარიფო გაანგარიშებებს სემეკს გამანაწილებელი, გადაცემა-დისპეჩერიზაციისა და გენერაციის სხვა კომპანიებიც სთხოვენ.