თბილისში, ჭონქაძის ქუჩაზე მომხდარი მკვლელობისთვის დაკავებული ბრალს არ აღიარებს, შიმშილობას აცხადებს და ოჯახთან ერთად საქართველოს მოქალაქეობაზე უარს ამბობს. ამის შესახებ ადვოკატმა განაცხადა, რომელიც მისი დაცვის ქვეშ მყოფს დიღმის სამმართველოში შეხვდა.
მისივე თქმით, დაკავებული პირველი ჯგუფის ინვალიდია. ასევე, როგორც ადვოკატმა განაცხადა, ბრალდებულს სხეულზე დაზიანებაც აღენიშნება, რომელიც პოლიციის განყოფილებაში გადაყვანისას მიიღო.
შინაგან საქმეთა სამინიტრომ წარსულში მრავალჯერ ნასამართლევი პირი დღეს დააკავა. დანაშაულის მოტივად შურისძიება სახელდება. გამოძიების ინფორმაციით, ბრალდებულმა ნაცნობს ცეცხლსასროლი იარაღიდან გასროლით სხეულზე მრავლობითი ჭრილობა მიაყენა და შემთხვევის ადგილიდან მიიმალა. დაჭრილი საავადმყოფოში მიყვანისთანავე გარდაიცვალა. პოლიციამ მკვლელობის ჩადენის იარაღი ნივთმტკიცებად ამოიღო.