ოკუპირებულ ახალგორში დაკავებული სამოქალაქო აქტივისტი თამარ მეარაყიშვილი ცხინვალის ე.წ. პროკურატურამ გაათავისუფლა. გუშინ დაკავებული აქტივისტი რამდენიმესაათიანი დაკითხვის შემდეგ, შინ დაბრუნდა. თუმცა, ის ვალდებული იყო ე.წ. პროკურატურაში დღეს დილიდან კვლავ გამოცხადებულიყო და ამ წუთებში იკითხება.
სამართალდამცველებმა მეარაყიშვილის სახლიც გაჩხრიკეს. ახლობლების ინფორმაციით, ისინი გარკვეულ ლიტერატურას ეძებდნენ. აქტივისტმა დაკავებისას “ეხო კავკაზას” რედაქციასთან დაკავშირება მოასწრო, სადაც ჟურნალისტებს არსებული ვითარების შესახებ მიაწოდა ინფორმაცია და დახმარება სთხოვა.
სამოქალაქო აქტივისტის თამარ მეარაყიშვილის ოკუპირებულ ახალგორში დაკავებას პოლიტიკოსები გამოეხმაურნენ.
ხელისუფლება მომხდართან დაკავშირებით შეშფოთებას გამოთქვამს და აღნიშნავს, რომ საერთაშორისო პარტნიორები საქმის კურსში არიან. მათი თქმით, მეარაყიშვილის უსაფრთხოებისთვის ყველაფერი გაკეთდება.