საქართველოს რკინიგზის შენობასთან რკინიგზელები შიმშილობის აქციას განაგრძობენ. გუშინ საღამოს ერთ-ერთი მოშიმშილე, ვახტანგ ცისკარიშვილი ცუდად გახდა და ადგილზე სასწრაფო გამოიძახეს. სამედიცინო დახმარების გაწევის შემდეგ კი ის ექიმების რეკომენდაციით ახლა სახლში იმყოფება.
დღეს კი მოშიმშილეებს კიდევ ერთი რკინიგზელი შემოუერთდა, გურამ ბიბილაშვილი. ბიბილაშვილი აცხადებს, რომ ის უკანონოდ 1 აგვისტოს ყოველგვარი ახსნისა და კომპენსაციის გადახდის გარეშე გაათავისუფლეს. მოშიმშილეებთან ერთად იმყოფებიან რკინიგზელთა ახალი პროფკავშირების წარმომადგენელი ილია ლეჟავაც. მისი განცხადებით, გუშინ შუადღისკენ რკინიგზის საზოგადოებასთან ურთიერთობის ხელმძღვანელი დაჩი ცაგურია შეხვდა აქციის მონაწილეებს, თუმცა შეთანხმება მაინც ვერ მოხდა.
ლეჟავას განცხადებით, მოშიმშილეები თანახმანი არიან რკინიგზის დეპარტამენტის მიერ შეთავაზებულ საცხოვრებელ და ტრანსპორტირების პირობებზე, მაგრამ მოითხოვენ, რომ აღნიშნული შეთავაზება ოფიციალური ხელშეკრულებით გაფორმდეს, რადგან ხელმძღვანელობამ მომავალში ის ვერ დაარღვიოს, თუმცა მსგავსი შეთანხმების გაფორმებაზე რკინიგზის ხელმძღვანელობა ამ დრომდე არ თანხმდება.
ამის პარალელურად რკინიგზის ახალი პროფკავშირების წარმომადგენლები საქალაქო სასამართლოსთვის სარჩელით მიმართვას აპირებენ. სარჩელის მიზანია, რომ აქციის მონაწილეებისთვის საპატრულო პოლიციის მხრიდან კარვის აშლა ჩაითვალოს უკანონოდ და მოშიმშილეებს კვლავ მიეცეთ კარვის გაშლის უფლება.
ამასთან, დღეს საღამოს 18:00 საათზე რკინიგზის შენობასთან სოლიდარობის აქცია იგეგმება. როგორც რკინიგზის ახალ პროფკავშირებში აცხადებენ, აქციას რეგიონიდან რკინიგზელები შემოუერთდებიან.