არასამთავრობო ორგანიზაციები საკონსტიტუციო რეფორმასთან დაკავშირებით დაგეგმილ კონსულტაციებზე განცხადებას ავრცელებენ.
არასამთავრობოებს მიაჩნიათ, რომ დღევანდელი კონსულტაცია იძლევა ჩიხური სიტუაციიდან გამოსვლის შესაძლებლობას. მათივე განცხადებით, საკვანძო საკითხს კონსტიტუციის პროექტში პროპორციულ საარჩევნო სისტემაზე 2020 წელს გადასვლა წარმოადგენს.
"მიუხედავად იმისა, რომ საკონსტიტუციო ცვლილებების პროექტში აზრთა სერიოზულ სხვადასხვაობას არაერთი საკითხი იწვევს, მათ შორის კვლავაც პრობლემურია დებულებები პრეზიდენტის არჩევის, მართლმსაჯულებისა და ადამიანის უფლებების შესახებ. მივიჩნევთ, რომ პირველ რიგში აუცილებელია კონსენსუსი შედგეს საპარლამენტო საარჩევნო სისტემის გარშემო. შეთანხმების მიუღწევლობისა და არასამართლიანი საარჩევნო სისტემის შენარჩუნების პირობებში, მივიღებთ ერთი პარტიის მიერ მიღებულ კონსტიტუციას რაც გააღვივებს პოლიტიკურ დაპირისპირებას, გაზრდის დაძაბულობას პოლიტიკურ პარტიებს შორის, დააზიანებს ქვეყნის რეპუტაციას, შეაფერხებს ქვეყნის სტაბილურ განვითარებას და საქართველოს ევროატლანტიკურ სტრუქტურებთან დაახლოებას. მოვუწოდებთ მხარეებს არ იხელმძღვანელონ ვიწრო პარტიული პოზიციებიდან გამომდინარე და გადაწყვეტილება მიიღონ ქვეყნის ინტერესების შესაბამისად. ვფიქრობთ, რომ განსაკუთრებული პასუხისმგებლობა ამ პროცესის პოზიტიურად დასრულებაზე აკისრია მმართველ პოლიტიკურ პარტიას. ვიმედოვნებთ, რომ მმართველი პოლიტიკური პარტია გადადგამს კონკრეტულ ნაბიჯებს კონსესუსის მისაღწევად", - ნათქვამია განცხადებაში.
განცხადებას ხელს აწერენ საერთაშორისო გამჭვირვალობა საქართველო, სამართლიანი არჩევნებისა და დემოკრატიის საერთაშორისო საზოგადოება, სამოქალაქო განვითარების სააგენტო, ლიბერალური აკადემია თბილისი და ინფორმაციის თავისუფლების განვითარების ინსტიტუტი.