ბარსელონაში მომხდარ ტერაქტს გმობს საერთაშორისო თანამეგობრობა. ამერიკის შეერთებული შტატების პრეზიდენტმა ესპანელ ხალხს თანადგომა გამოუცხადა. ამერიკა თქვენს გვერდით დგას და მზად არის ესპანეთს ყველა სახის დახმარება აღმოუჩინოს, - დაწერა დონალდ ტრამპმა თვითერში.
ტერაქტი დაგმო შეერთებული შტატების ვიცე-პრეზიდენტმა მაიკ პენსმა და სახელმწიფო მდივანმა რექს ტილერსონმა. პენსმა განაცხადა, რომ ტერორიზმი თანამედროვე მსოფლიოსთვის შავი ლაქაა.
კატალონიაში დატრიალებულ ტრაგედიას მსოფლიო ლიდერები სოციალურ ქსელში ეხმაურებიან და ესპანელ ხალხს თანადგომას უცხადებენ.
ტერორიზმს ერთიანობით დავამარცხებთ, – ამბობს ნატო-ს გენერალური მდივანი.
ტერაქტის შედეგად გარდაცვლილთა ხსოვნის და ესპანეთის მიმართ სოლიდარობის ნიშნად, საფრანგეთში რამდენიმე წუთის განმავლობაში ეიფელის კოშკის ელექტროგანათება გამოირთო.
ესპანეთში ადგილობრივი დროით 12 საათზე პლაზა კატალონიაზე მსვლელობა გაიმართება, რომელსაც მთავრობისა და ოპოზიციის წევრებიც შეუერთდებიან.