ბარსელონაში საქართველოს ვიცე-კონსული ლია ახალბედაშვილი აცხადებს, რომ ამ დროის მონაცემებით, ბარსელონაში ტერაქტის დროს დაშავებულთა შორის საქართველოს მოქალაქეები არ არიან.
როგორც პირველ არხს ლია ახალბედაშვილმა განუცხადა, საქართველოს რამდენიმე მოქალაქეს გადაადგილების პრობლემა ჰქონდა, რაშიც საკონსულო დაეხმარა.
"სასიხარულოა, რომ ამ დროის მონაცემებით დაშავებულთა შორის კვლავ არ არიან საქართველოს მოქალაქეები. ჩვენს მოქალაქეებს ჰქონდათ გადაადგილების პრობლემა. პოლიციის დახმარებით უზრუნველყავით, რომ ისინი ამოგვეყვანა საკონსულოში. ჩვენთან გარკვეული პერიოდის დაყვეს და შემდეგ მოვახერხეთ მათი სასტუმრომდე მიყვანა. ისინი არიან უსაფრთხოდ. მათი სასტუმრო იყო ცენტრალურ ადგილზე და ფაქტობრივად იქ ქუჩები იყო პარალიზებული, აქედან გამომდინარე ვერ გადაადგილდებოდნენ. გვიან ღამით, როდესაც შეიძლებოდა გადაადგილება, მივიყვანეთ პირადად და დავტოვეთ სასტუმროში. სხვა სახის პრობლემები არ ფიქსირდება. ძირითადად იყო ის, რომ ისინი იყვნენ ქუჩაში, თავს ვერ აფარებდნენ და ეს იყო ერთადერთი პრობლემა, რაც ჩვენი მოქალაქეების მხრიდან გუშინ დაფიქსირდა", - განაცხადა ვიცე-კონსულმა.
მისივე ინფორმაციით, საკონსულოს თანამშრომლები სულ ექვს ქართველს დაეხმარნენ.
"ჩვენ სულ 6 ქართველს დავეხმარეთ, ისინი ტერაქტის ფაქტს არ შესწრებიან, რადგან ფაქტობრივად სულ რაღაც წუთებით ასცდნენ ამ ყველაფერს. ვესაუბრე ყველა მათგანს, მათი მდგომარეობა ნორმალურია, არ სჭირდებათ ფსიქოლოგიური დახმარება. ისინი კვლავ რჩებიან ბარსელონაში და განაგრძობენ თავიანთ საქმეს", - განაცხადა ლია ახალბედაშვილმა.