კატალონიის პოლიციის ინფორმაციით, ტერაქტში მთავარი ბრალდებული, შესაძლოა, საფრანგეთში გადასულიყო.

ბარსელონაში ტერაქტის შედეგად დაღუპული ადამიანების ხსოვნას პატივი მიაგეს.

ცერემონიას ესპანეთის მეფე ფილიპე მეუღლესთან ერთად, ასევე პოლიტიკოსები და რიგითი ადამიანები დაესწრნენ.

სამეფო ოჯახის წევრები უკვე იმყოფებოდნენ საავადმყოფოში, სადაც ტერაქტის დროს დაშავებული ადამიანები მოინახულეს.

ესპანეთის მთავრობაში აცხადებენ, რომ ბარსელონას ტერაქტთან დაკავშირებული ჯიჰადისტური ქსელი სრულად განეიტრალებულია.

ქვეყნის შინაგან საქმეთა მინისტრის ინფორმაციით, აღნიშნული დასკვნის გაკეთება მოკლული და დაკავებული ადამიანების იდენტიფიცირების შემდეგ გახდა შესაძლებელი.

მიუხედავად ამისა, კატალონიის რეგიონულ მთავრობაში ამბობენ, რომ, შესაძლოა, დაკავებები კიდევ განხორციელდეს.

ამ დრომდე იძებნება ფურგონის მძღოლი, რომელიც ბარსელონას ცენტრში ფეხით მოსიარულეებს დაეჯახა.

ესპანეთის პოლიცია მაროკოში დაბადებული 22 წლის იუნის აბუიაქუბს ეძებს. ბარსელონაში განხორციელებული ტერაქტის შედეგად 14 ადამიანი დაიღუპა და 100-ზე მეტი დაშავდა.