ამერიკულ ქალაქ ბოსტონში, სადაც სიტყვის თავისუფლების მოთხოვნით აქცია გაიმართა, 27 ადამიანი დააკავეს.

ამის შესახებ Boston Globe სამართალდამცავ უწყებაზე დაყრდნობით წერს.

ამერიკული მედიის ცნობით, დაკავებები ხულიგნობასა და სხვა დარღვევების ფაქტებზე განხორციელდა.

„აქციაზე რამდენიმე ადამიანი მცირე დაპირისპირების გამო დააკავეს“,- განუცხადეს გამოცემას სამართალდამცავ უწყებაში.

ბოსტონში მიმდინარე მანიფესტაციაზე წესრიგს 500-ზე მეტი პოლიციელი იცავდა.

ბოსტონის ქუჩებში „სიტყვის თავისუფლების კავშირმა“ ნეონაცისტებისა და ულტრანაციონალისტების საპასუხოდ მასშტაბური აქცია გამართა. ასობით მოქალაქე ერთი კვირის წინ ვირჯინიის ქალაქ შარლოტსვილში მიმდინარე პროცესებსა და ტრაგედიას აპროტესტებდა, რასაც 32 წლის ჰიტერ ჰეიერის სიცოცხლე ემსხვერპლა.