2014 წლიდან აღმოსავლეთ უკრაინაში, კონფლიქტის ზონაში 2 700-ზე მეტი მშვიდობიანი მოქალაქე დაიღუპა. ინფორმაციას უკრაინაში საერთაშორისო წითელი ჯვრის წარმომადგენლობა ფეისბუქის გვერდზე ავრცელებს.

უკრაინაში სამხედრო კონფლიქტის შედეგად, 2 700-ზე მეტი მშვიდობიანი მოქალაქე დაიღუპა, მილიონზე მეტი ოჯახი იძულებული გახდა საცხოვრებელი სახლი დაეტოვებინა, - ნათქვამია ორგანიზაციის განცხადებაში.

გარდა ამისა, წითელი ჯვრის მონაცემებით, კონფლიქტის შედეგად დაზარალებულ ტერიტორიაზე სულ 500 ათასი ბავშვი ცხოვრობს.

2017 წლის გაზაფხულზე, გაერო-ს ადამიანის უფლებათა მონიტორინგის მისიამ უკრაინაში კონფლიქტის შედეგად, მსხვერპლთა რაოდენობა შეაფასა.

მისიის თანახმად, სამი წლის განმავლობაში თითქმის 10 000 ადამიანი დაიღუპა. ეს რიცხვი მოიცავს როგორც სამოქალაქო პირებს, ასევე საბრძოლო მოქმედებებში მონაწილე პირებს.

კონფლიქტის შედეგად, ასევე 23 500 ადამიანი დაშავდა.