ესპანეთში, ქალაქ რიპოლში, ერთ-ერთ საცხოვრებელ სახლში სპეცოპერაციის შედეგად, სამართალდამცავებმა ორი ჩანთა და ყუთში მოთავსებული სხვადასხვა სახის მასალა ამოიღეს. პოლიცია ამ დრომდე ეძებს 22 წლის მაროკოელ იუნის აბუიაქუბს, რომელიც, სავარაუდოდ, იმ ავტომობილს მართავდა, რომელიც რამბლას ქუჩაზე ქვეითად მოსიარულეებს დაეჯახა.
ორი დღით ადრე კი ჩხრეკის ოპერაცია გაუჩინარებული იმამის, ეს-სათის სახლში ჩატარდა. გამოძიება ცდილობს, დაადგინოს მისი როლი ამჟამად უკვე ლიკვიდირებულ ტერორისტულ დაჯგუფებასთან მიმართებით. პოლიცია არ გამორიცხავს, რომ იმამი ალკანარაში აფეთქებას ემსხვერპლა, სადაც ტერორისტები მორიგ თავდასხმას ამზადებდნენ.
ბარსელონაში 17 აგვისტოს განხორციელებული თავდასხმის შედეგად 14 ადამიანი დაიღუპა და 130-ზე მეტი დაშავდა.
დაღუპულთა შორის არის 7 წლის ჟულიან კადმანიც, ავსტრალიისა და დიდი ბრიტანეთის ორმაგი მოქალაქეობის მქონე პირი, რომელიც ტერაქტის შემდეგ დაკარგულად ითვლებოდა. ბიჭის დედა ამ დრომდე საავადმყოფოში მკურნალობს. მისი მდგომარეობა სტაბილურად მძიმეა.