პარლამენტის ვიცე-სპიკერის, ზვიად ძიძიგურის განცხადებით, მას შემდეგ, რაც საკონსტიტუციო ცვლილებებთან დაკავშირებით უმრავლესობა ოპოზიციის ოფიციალურად გაგზავნილ წერილს მიიღებს, საკითხზე მმართველ გუნდში მსჯელობა გაიმართება.
როგორც პირველ არხს ძიძიგურმა განუცხადა, ახალი ამბავი არ არის, რომ ოპოზიცია დღის წესრიგში საარჩევნო საკითხებს აყენებს.
"ჩვენ ახალ რეჟიმზე გადავედით, სადაც ოპოზიციის ფორმატი სრულიად განსაზღვრულია - კვალიფიციური ოპოზიციური პარტიები და უმრავლესობა მაგიდასთან დასხდნენ. როცა მათი მხრიდან ოფიციალურად გამოგზავნილ წერილს მივიღებთ, უმრავლესობაში მსჯელობა იქნება და მათ უმრავლესობის სახელით ვუპასუხებთ. უმრავლესობაში მზაობაა, რომ ოპოზიციის მოსაზრებები მოვისმინოთ და მათთან თანამშრომლობის რეჟიმი გვქონდეს. ეს მოსმენა მოსმენისთვის არ არის, გვაინტერესებს, თუ რა პოზიციები აქვთ. პოლიტიკურ სპექტრში ოპოზიციური პარტიები მრავლად არიან წარმოდგენილი და ამიტომ, ჩვენთვის მათი მოსაზრებები სულერთი არ არის. რას გავიზიარებთ და რას არა, ამას მაშინ ვნახავთ, როცა უმრავლესობის სხდომა გაიმართება", - განაცხადა ძიძიგურმა.
ოპოზიციური პარტიები მმართველი გუნდისთვის წერილის გაგზავნას დღეს აპირებენ, სადაც საკონსტიტუციო ცვლილებებთან დაკავშირებით მათი მოთხოვნები იქნება წარმოდგენილი.