ბორჯომის ხეობაში მასშტაბური ხანძრის მიზეზის დასადგენად გამოძიება გრძელდება. მანამდე კი სპეციალისტები არ გამორიცხავენ, რომ ცეცხლის გაჩენა შესაძლოა დაუდევრობამ გამოიწვია. მით უმეტეს, რომ ივლისის მეორე ნახევრიდან აგვისტოს ბოლომდე, ქვეყნის მასშტაბით, ტყის მასივებში ტემპერატურის მკვეთრად მატების გამო ხმელი საფარი სწრაფად იწვის. შესაბამისად ამ პერიოდში ტყეებში ხანძრის გაჩენის საფრთხეც მაღალია.

უსაფრთხოების ნორმების დასაცავად და მოქალაქეთა მხრიდან დაუდევრობის ფაქტების თავიდან ასაცილებლად სპეციალისტები ხელისუფლებას პრევენციული ზომების გაძლიერებას და ტყის მასივებში მონიტორინგის გამკაცრებას ურჩევენ.