ალექსანდრე ჯეჯელავა 146-ე სკოლის მოსწავლეების ყირიმში ჩასვლის ფაქტს გამოეხმაურა. მისი განცხადებით, ყირიმში მოსწავლეების გამგზავრების საკითხი განათლებისა და მეცნიერების სამინისტროსთან შეთანხმებული არ იყო.

როგორც ალექსანდრე ჯეჯელავამ განაცხადა, არ არის გამორიცხული, სკოლის დირექტორისა და ამ საქმეში ყველა ჩართული პირის პასუხისმგებლობა დადგეს.

„ეს არის აბსოლუტურად მიუღებელი გადაწყვეტილება სკოლის მასწავლებლების, ადმინისტრაციის და ოჯახის. ეს კიდევ უფრო გასაკვირია, რომ ოჯახებმა გადაწყვიტეს თავისი შვილები გაეგზავნათ ოკუპირებულ ტერიტორიაზე და ძალიან სამწუხაროა, რომ შეიძლება სასწავლებელმა, სკოლის ადმინისტრატორმა ასეთი გადაწყვეტილება მიიღოს. ჩვენ ვგმობთ რა თქმა უნდა, ოკუპაციას ყირიმში და ვთვლით, რომ გაცილებით მეტი პასუხისმგებლობა უნდა გამოიჩინონ მასწავლებლებმა“, - განაცხადა ალექსანდრე ჯეჯელავამ.

მინისტრის თქმით, დაისჯება ყველა, ვისი პასუხისმგებლობაც გამოიკვეთება.

„ჩვენს კომპეტენტურ ორგანოებთან ერთად მოვიკვლევთ ამ სიტუაციას. მინიმუმ ძალიან არასწორ გადაწყვეტილებასთან გვაქვს საქმე და მაქსიმუმ ბოროტ განზრახვას თან. დაისჯება აუცილებლად ყველა, ვისი პასუხისმგებლობაც გამოიკვეთება ასეთ წინდაუხედავ გადაწყვეტილებაში. აბსოლუტურად არ არის გამორიცხული, ვინც საქმის კურსში იყო, ყველას პასუხისმგებლობის საკითხი რომ დადგეს. მათ შორის, დირექტორის“, - განაცხადა ჯეჯელავამ.