ავღანეთის ჰელმანდის პროვინციაში აფეთქების შედეგად დაიღუპა ხუთი და დაშავდა 42 ადამიანი.
სააგენტო Reuters-ის ინფორმაციით, თვითმკვლელმა ტერორისტმა მანქანაში დამონტაჟებული ასაფეთქებელი მოწყობილობა პოლიციის განყოფილების შენობასთან აამოქმედა.
აფეთქება მაშინ მოხდა, როდესაც პროვინციის ადმინისტრაციულ ცენტრში, ქალაქ ლაშქარგაჰში პოლიციის განყოფილებასთან სამართალდამცველები და სამხედროები ხელფასის მისაღებად იყვნენ შეკრებილები.
დაღუპულთა შორის, ერთი ბავშვი, ორი ქალი და ორი სამხედროა. როგორც სააგენტო Reuters-ს ადგილობრივი საავადმყოფოს ექიმმა განუცხადა, მსხვერპლთა რიცხვი შესაძლოა, გაიზარდოს, რადგან რამდენიმე დაშავებულის მდგომარეობა უკიდურესად მძიმეა.
ივნისში ლაშქარგაჰში ხელფასის მისაღებად ბანკში მისულ სამხედროებსა და სამართალდამცავებზე რამდენიმე თავდასხმა განხორციელდა. ამის გამო ბანკის ოფისი პოლიციის განყოფილება გადაიტანეს.