„ნორმანდიული ოთხეულის“ ლიდერები ახალი სასწავლო წლის დაწყებიდან დონბასში ცეცხლის შეწყვეტის რეჟიმის გამოცხადებაზე შეთანხმდნენ.

გერმანიის კანცლერი, საფრანგეთის, უკრაინისა და რუსეთის პრეზიდენტები ერთმანეთს ტელეფონით ესაუბრნენ.

ანგელა მერკელმა, ემანუელ მაკრონმა, პეტრო პოროშენკომ და ვლადიმერ პუტინმა იმედი გამოთქვეს, რომ აღმოსავლეთ უკრაინაში უსაფრთხოების მხრივ ვითარება გაუმჯობესდება.

როგორც გერმანიის მთავრობის ოფიციალურმა წარმომადგენელმა შტეფენ ზაიბერტმა განაცხადა, „ნორმანდიული ოთხეულის“ წევრები იმედოვნებენ, რომ ცეცხლის სრული შეწყვეტით შესაძლებელი იქნება „მინსკის შეთახმებების“ განხორციელება.

გაერო-ს მონაცემებით, დონბასში სამწლიანი სამხედრო მოქმედებების შედეგად 2500 მშვიდობიანი მცხოვრები დაიღუპა, 9000-მდე კი დაშავდა. კონფლიქტის განმავლობაში საკუთარი სახლები 1,6 მილიონმა ადამიანმა, ანუ უკრაინის მოსახლეობის 4%-მა დატოვა.