საქართველოს თავდაცვის მინისტრი დილიდან ბორჯომის ხეობაში ხანძრის სალიკვიდაციო სამუშაოებს ადგილზე ეცნობოდა. ლევან იზორიამ საქართველოს შეიარაღებული ძალების გენერალური შტაბის უფროსთან, გენერალ-მაიორ ვლადიმერ ჩაჩიბაიასთან და რეგიონული განვითარებისა და ინფრასტრუქტურის მინისტრ ზურაბ ალავიძესთან ერთად წაღვერის და ტიმოთეს უბნის ქედზე ხანძრის გავრცელების არეალი ვერტმფრენით მოინახულა, რის შემდეგაც საგანგებო შტაბის წევრებისგან ხანძრის სალიკვიდაციო სამუშაოების მიმდინარეობის შესახებ დეტალური ინფორმაცია მიიღო.
თავდაცვის მინისტრის განცხადებით, სტიქიის ლიკვიდაციის საქმეში პრემიერ-მინისტრის ხელმძღვანელობით, თითოეული უწყება კოორდინირებულად მუშაობს. მან პარტნიორების მხარდაჭერაზეც გაამახვილა ყურადღება. ლევან იზორიამ აღნიშნა, რომ ბორჯომის ხეობის პირობებში ცოცხალი ძალის გამოყენების შესაძლებლობა რთული რელიეფის გამო ნაკლებია. მისი განმარტებით, ამ შემთხვევაში ძირითადი აქცენტი ტექნიკურ შესაძლებლობებზე კეთდება. „დამატებით კიდევ უზრუნველვყოფთ ტექნიკის ჩართულობას. ჩვენ გვეყოლება მუდმივი წარმომადგენლები საგანგებო შტაბში“, - განაცხადა ლევან იზორიამ.
მთელი ღამის განმავლობაში თავდაცვის მინისტრი და გენერალური შტაბის უფროსი I ქვეით ბრიგადის სამხედრო მოსამსახურეებთან ერთად ატენის ხეობაში ხანძრის სალიკვიდაციო სამუშაოებში მონაწილეობდნენ. გამთენიისას ხანძრის კერა უკვე ლიკვიდირებული იყო, თუმცა ადგილზე ორი დღის განმავლობაში რამდენიმე ათეული სამხედრო მოსამსახურე რჩება, რომლებიც პრევენციის მიზნით ტერიტორიის მონიტორინგს ახორციელებენ.
სამხედრო მოსამსახურეებს ატენის ხეობაში გაწეული მუშაობისთვის საქართველოს პრეზიდენტმა გიორგი მარგველაშვილმა, პრემიერ-მინისტრმა გიორგი კვირიკაშვილმა, ეროვნული უშიშროების საბჭოს მდივანმა დავით რაქვიაშვილმა და პარლამენტის თავმჯდომარემ ირაკლი კობახიძემ მადლობა გადაუხადეს.