საქართველოს კონსტიტუციის დღისადმი მიძღვნილი მიღება აღარ გაიმართება, - ამის შესახებ პრეზიდენტის ადმინისტრაციის უფროსმა გიორგი აბაშიშვილმა განაცხადა.

მისი განმარტებით, ღონისძიების გადადება ბორჯომის ხეობაში განვითარებულ მოვლენებს უკავშირდება.

როგორც აბაშიშვილმა აღნიშნა, საქართველოს პრეზიდენტი გიორგი მარგველაშვილი, პრემიერ-მინისტრი გიორგი კვირიკაშვილი და პარლამენტის თავმჯდომარე ირაკლი კობახიძე შეთანხმდნენ, რომ მიღება გაუქმებულიყო.

ამასთან, მისივე თქმით, კონსტიტუციის დღესთან დაკავშირებით მხოლოდ რამდენიმე ღონისძიება გაიმართება.

„კონსტიტუციის დღის აღვნიშვნა ერთგვარ ტრადიციად იქცა. უკვე სამი წელია, კონსტიტუციის დღე სხვადასხვა ფორმით აღინიშნება. დღესაც გვინდოდა, ღონისძიებები ყოფილიყო მასშტაბური, მაგრამ ქვეყანაში შექმნილი მდგომარეობიდან გამომდინარე, გადაწყდა მხოლოდ მინიმალისტური ღონისძიებებით დღევანდელი დღის აღნიშვნა. კონსტიტუციის ქუჩაზე ახალგაზრდების ინიციატივით, საღამოს 18:00 საათზე აღინიშნება კონსტიტუციის დღე. ჩატარდება სხვადასხვა ტიპის ღონისძიება. მათ შორის, იქნება მუსიკალური გაფორმებებით, ასევე გამოფენა, სადაც წარმოდგენილი იქნება ერთგვარი ისტორიული კონტექსტი საქართველოს კონსტიტუციის შესახებ“, - განაცხადა აბაშიშვილმა.