საქართველოს რკინიგზის დეპარტამენტთან გუშინ მომხდარი დაპირისპირების შედეგად 10 პირია დაკავებული. მოშიმშილე რკინიგზელები იმ გადაწყვეტილებას აპროტესტებდნენ, რომლის თანახმადაც, რკინიგზის შენობასთან მათ კარვების გაშლის უფლება არ მიეცათ.
პროტესტის ნიშნად ისინი შენობაში შეჭრას შეეცადნენ, რასაც სამართალდამცავების მხრიდან 3 პირის დაკავება მოჰყვა. მოგვიანებით ვითარება კიდევ უფრო გამწვავდა, რის შემდეგაც სამართალდამცველებმა კიდევ რამდენიმე პირი დააკავეს.
დაკავებულებს შორის არიან „აუდიტორია 115-ის“ წევრებიც, რომლებმაც მოშიმშილე რკინიგზელებს მხარდაჭერა გამოუცხადეს.
გუშინვე დაკავებული პირების სანახავად რკინიგზის დეპარტამენტში სახალხო დამცველის წარმომადგენელიც იმყოფებოდა.
მარნეულიდან გურჯაანში გადაყვანილი თანამშრომლების აქცია რკინიგზის შენობის წინ, კვლავ ძველ სამუშაო ადგილზე დაბრუნების მოთხოვნით, უკვე მე-11 დღეა, მიმდინარეობს.
საქართველოს რკინიგზა მოშიმშილე რკინიგზელებს შიმშილობის შეწყვეტისა და მოლაპარაკებების დაწყებისკენ მოუწოდებს. საქართველოს რკინიგზა მოშიმშილეთა მხრიდან რკინგზის შენობაში შეჭრის საკითხსაც შეეხო და მომხდარი ძალადობად შეაფასა.