ცენტრალურმა საარჩევნო კომისიამ არ დაადგინა ის ობიექტური კრიტერიუმები, რითაც მოხდებოდა საოლქო საარჩევნო კომისიის წევრების ობიექტური შერჩევა და დანიშვნა პროფესიონალური ნიშნით, - ამის შესახებ „ერთიანი ნაციონალური მოძრაობის” წევრმა ლევან ბეჟაშვილმა განაცხადა.

ლევან ბეჟაშვილი აცხადებს, „ქართული ოცნების“ საარჩევნო შტაბები ცდილობენ, საოლქო საარჩევნო კომისიების კვოტით დანიშნონ საუბნო საარჩევნო კომისიის წევრები.

„ქართული ოცნების“ საარჩევნო შტაბებსა და საოლქო საარჩევნო კომისიებში საქმიანობის კორელაცია და ურთიერთშეთანხმებული მოქმედებები ხორციელდება. ჩვენ გვაქვს კონკრეტული ფაქტები. როგორც აუდიო ჩანაწერები, ისე ფოტო მტკიცებულებები, რომელიც ამ შეთანხმებულ საქმიანობას ადასტურებს. ფაქტია, რომ ცენტრალურმა საარჩევნო კომისიამ არ დაადგინა ის ობიექტური კრიტერიუმები, რითაც მოხდებოდა საოლქო საარჩევნო კომისიის წევრების ობიექტური შერჩევა და დანიშვნა პროფესიონალური ნიშნით“, - განაცხადა ლევან ბეჟაშვილმა.

როგორც ბეჟაშვილმა განაცხადა, ცენტრალურმა საარჩევნო კომისიამ სულ მცირე უნდა დაადგინოს მოთხოვნა საოლქო კომისიებისათვის, როდესაც საუბნო კომისიის წევრების შერჩევა მოხდება შერჩევითი პრინციპის საფუძველზე და უფრო მეტი ობიექტურობის გარანტიები შეიქმნება არჩევნების ჩატარებისთვის.

„მარტვილის საოლქო საარჩევნო კომისიის მაგალითზე გვაქვს კონკრეტული სატელეფონო ჩანაწერები, სადაც ადამიანები აღნიშნავენ, რომ სწორედ „ქართული ოცნების“ საარჩევნო შტაბიდან დაურეკეს მათ და დაავალეს, სთხოვეს, რომ საუბნო საარჩევნო კომისიის წევრის კანდიდატურაზე შეეტანათ განცხადება და მოხდებოდა მათი დანიშვნა. ასევე გვაქვს ჩანაწერები როდესაც კანონის დარღვევით, არა პირადად ხდება განცხადებების შეტანა, არამედ სოფლის რწმუნებულების ან საოლქო საარჩევნო კომისიის წევრების მეშვეობით. ეს კიდევ ერთხელ ადასტურებს იმას, რომ სასწრაფოდ შესაცვლელია კანონმდებლობა“, - განაცხადა „ერთიანი ნაციონალური მოძრაობის” წევრმა.