თბილისის საქალაქო სასამართლო დედაქალაქის საკრებულოს დეპუტატის ზურაბ ნეფარიძისა და მისი ცოლის დის, ანა მენთეშაშვილის აღკვეთის ღონისძიების საკითხზე მსჯელობას იწყებს. დაცვის მხარე განმარტავს, რომ ნეფარიძეს ბრალად ედება ერთ-ერთი თანამშრომლისთვის ყოველთვიურად, ხელფასიდან 400 ლარის გამორთმევა იმის სანაცვლოდ, რომ ის სამსახურიდან არ გაეგდოთ.
დაკავებულები ბრალს არ აღიარებენ. როგორც ნეფარიძის ადვოკატმა განმარტა, თანამშრომელი მას საკუთარი ნებით აძლევდა თანხას.
პროკურატურა ბრალდებულებისთვის პატიმრობის შეფარდებას ითხოვს. ადვოკატი კი, მათთვის გირაოს შეფარდების მოთხოვნით გამოდიან.
პროკურორის განცხადებით, გამოძიება ზურაბ ნეფარიძის მიერ სხვა თანამშრომლებისთვის ფულის გამოძალვის ფაქტებსაც სწავლობს. როგორც პროკურორმა ბექა ეჟიშვილმა განაცხადა, გამოძიებას აქვს ინფორმაცია, რომ შესაძლოა, ნეფარიძე ხელფასიდან თანხას სხვა თანამშრომლებსაც სძალავდა. მისივე თქმით, საქმეში ერთი დაზარალებულია დალი მამულაშვილი, რომელსაც ნეფარიძე აიძულებდა, ხელფასიდან 400 ლარი მისთვის მიეცა, წინააღმდეგ შემთხვევაში, სამსახურიდან გაათავისუფლებდა.
პროკურორის თქმით, ნეფარიძეს ქრთამის აღების გარდა, კიდევ ერთი მუხლით ედავებიან. ბრალდების მტკიცებით, ნეფარიძემ შრომითი კანონმდებლობა დაარღვია, როდესაც ისნის მაჟორიტარის ბიუროს თანამშრომელს დალი მამულაშვილს აიძულა, გათავისუფლებაზე განცხადება დაეწერა.
სასამართლო პროცესი საქალაქო სასამართლოში უკვე დაიწყო.