დიდ ბრიტანეთში, აღმოსავლეთ სასექსის საგრაფოში ქიმიური ღრუბლის გამო, 200-ზე მეტი ადამიანი შეუძლოდ გახდა. მათგან 133 ჰოსპიტალიზებულია. ინფორმაციას ამის შესახებ BBC ავრცელებს.

ბრიტანული მედიის ინფორმაციით, ბერლინგ გეპის სანაპიროზე მყოფი ადამიანები თვალებისა და ყელის ტკივილს, სუნთქვის პრობლემებს უჩიოდნენ. პოლიცია მომხდარს ქიმიურ გაჟონვას უკავშირებს. ამჟამად სანაპიროდან ხალხი ევაკუირებულია.

სამართალდამცავები ვარაუდობენ, რომ მომხდარი დაუდგენელი ქიმიური ნივთიერების გაჟონვას უკავშირდება.

სპეციალისტები ცდილობენ დაადგინონ, რა ნივთიერებით მოიწამლნენ სანაპიროზე მყოფი ადამიანები.

ხელისუფლება ადგილობრივებს მოუწოდებს, გარეთ გასვლისგან თავი შეიკავონ და სახლებში კარ-ფანჯრები დახურონ.