აშშ-ში ერდოღანის დაცვის 15 წევრს ბრალი წაუყენეს. მათ მაისში ვაშინგტონში მომხდარ არეულობაში მონაწილეობაში ადანაშაულებენ. ამის შესახებ განცხადება კოლუმბიის ოლქის პროკურატურამ გაავრცელა.

დოკუმენტში ბრალდება შემდეგნაირად არის ფორმულირებული „შეთქმულება დანაშაულის ჩადენის მიზნით, რომელიც ითვალისწინებს ადამიანზე ძალადობას“.

განცხადებაში ხაზგასმულია, რომ 15-მა ბრალდებულმა აქციის მონაწილეებზე თავდასხმის დროს „საშიში იარაღი“ ჰქონდათ და აქტივისტებს „ფეხს ურტყამდნენ“. დანაშაულის დამტკიცების შემთხვევაში, თურქეთის პრეზიდენტის დაცვის წევრებს 15-წლამდე პატიმრობა ემუქრებათ.

საქმე ეხება 16 მაისს, როდესაც აშშ-ში თურქეთის ელჩის რეზიდენციასთან თურქეთის მოქმედი ხელისუფლების მომხრეთა და მოწინააღმდეგეთა შორის შეტაკება დაიწყო. შედეგად დაშავდა 9 ადამიანი. 2-მა მოქალაქემ სერიოზული დაზიანებები მიიღო. ინციდენტის დროს თურქეთის ელჩის რეზიდენციასთან იმყოფებოდა რეჯეპ ტაიპ ერდოღანიც.



თურქეთის მთავრობა ამტკიცებს, რომ ჩხუბის პროვოცირება თურქეთში აკრძალული „ქურთისტანის მუშათა პარტიის“ წევრებმა მოახდინეს. თუმცა, სამართალდამცავების ცნობოთ, არეულობა თურქეთის ლიდერის დაცვის წევრების ქმედებების გამო დაიწყო, რომლებიც აქციის მონაწილეებს სასტიკად გაუსწორდნენ.

მომხდარის გამო, 6 ივნისს აშშ-ის კონგრესის ქვედა პალატამ მიიღო რეზოლუცია, რომელშიც ერდოღანის დაცვის წევრების ქმედებები დაგმეს. კანონმდებლებმა დამნაშავეების დასჯა მოითხოვეს. ინციდენტში თურქეთის ლიდერის დაცვის წევრების მონაწილეობის გამო, შეშფოთება გამოთქვა აშშ-ის პრეზიდნტის ადმინისტრაციამ და სახელმწიფო დეპარტამენტმაც.