ამომრჩეველთა ერთიანი სიის გაუმჯობესების მიზნით, ახალი პირადობის მოწმობების უფასოდ გაცემის მორიგი აქცია იუსტიციის მინისტრის ბრძანებით 31 ოქტომბრამდე გაგრძელდება. ამის შესახებ ჟურნალისტებს ინფორმაცია სახელმწიფო სერვისების განვითარების სააგენტოს თავმჯდომარემ, სოსო გიორგაძემ მიაწოდა. მისი თქმით, აქცია მიზნად ისახავს საარჩევნო სიის დახვეწას და გაუმჯობესებას.

,,აქციის ფარგლებში პირადობის მოწმობის აღება უფასოდ შეუძლიათ მოქალაქეებს, რომლებსაც არ გააჩნიათ არცერთი მოქმედი პირადობის დამადასტურებელი დოკუმენტი, რომელთა რეგისტრაციის მისამართი ფიზიკურად აღარ არსებობს, ასევე მონაცემთა ბაზაში უსურათო და უხარისხო ჩანაწერის მქონე მოქალაქეებს, მისამართის გარეშე რეგისტრირებულ პირებს და ასევე, სრულწლოვან მოქალაქეებს და იმ პირებს, რომლებსაც აქციის დასრულებამდე უსრულდებათ 18 წელი. აქცია მიზნად ისახავს ამომრჩეველთა ერთიანი სიის ფორმირებას და გაუმჯობესებას, ის ხელს უწყობს მონაცემთა ბაზების დახვეწას და საარჩევნო სიების სრულლყოფას”,- განაცხადა სოსო გიორგაძემ.

მისი განმარტებით, პირადობის მოწმობის ასაღებად მოქალაქეებმა უნდა მიმართონ იუსტიციის სახლის ფილიალებს, სახელმწიფო სერვისების განვითარების სააგენტოს ტერიტორიულ სამსახურებს ან საზოგადოებრივ ცენტრებს.

იუსტიციის მინისტრის ინიციატივით, ელექტრონული პირადობის მოწმობის უფასოდ ან შეღავათიან ფასად გაცემის მიზნით, ამ დრომდე განხორციელებული აქციების ფარგლებში 1 000 000-ზე მეტმა მოქალაქემ პირადობის მოწმობა უფასოდ მიიღო. დღეის მდგომარეობით, პირადობის ელექტრონულ მოწმობას საქართველოს 2 000 000-ზე მეტი მოქალაქე ფლობს.