მსოფლიოს უძლიერესი მოჭადრაკე მაგნუს კარლსენი დღეს, გამთენიისას თბილისში ჩამოვიდა. მსოფლიოს მოქმედი ჩემპიონის გადაწყვეტილება უპრეცედენტოა, რადგან ის მსოფლიო თასის გათამაშებაზე პირველად ასპარეზობს.

თბილისში სულ 48 ქვეყნის 128 მოჭადრაკე ითამაშებს, ქართველთაგან კი მსოფლიო თასზე ბაადურ ჯობავა, მიხეილ მჭედლიშვილი, ლევან ფანცულაია და ნანა ძაგნიძე იასპარეზებენ.

ვაჟ მოჭადრაკეთა შორის მსოფლიო თასის გათამაშების გახსნის საზეიმო ცერემონია დღეს გაიმართება. პირველი ტურის პარტიები კი ხვალ ჩატარდება.