უკვე მეორე დღეა კახეთში ინტენსიური ხანძარსაწინააღმდეგო ღონისძიებები გრძელდება.

საგანგებო სიტუაციების მართვის სააგენტოს თანამშრომლებმა ავიაციის დახმარებით შეძლეს სოფელ შილდას მიმდებარედ გაჩენილი ცეცხლის ძირითადი კერების ლოკალიზება.

ტყის მასივში სტიქიას მაშველებთან ერთად, მეტყევეები და მოხალისეები ებრძვიან. ყვარლის რაიონში ხანძარმა ერთ ჰექტარზე არსებული ფოთლოვანი ხეები და ბუჩქნარი გაანადგურა.

ცეცხლის სალიკვიდაციო სამუშაოები იქ ამ წუთებშიც გრძელდება. გაცილებით რთული ვითარებაა თელავის მუნიციპალიტეტის სოფელ ართანაში, არსებული ინფორმაციით, კოხტას მთის ფერდობზე სტიქიამ ათობით ჰექტარი გაანადგურა. ცეცხლი მოდებულია როგორც ტყის მასივზე ისე მინდორზე, იწვის ბუჩქნარი.

10 ჰექტარზე მეტი ფართობის ტყის მასივი მოიცვა ხანძარმა თუშეთში. სოფელ ხახაბოს მიმდებარედ ტყე იწვის.

აღმოსავლეთ საქართველოში არსებული ხანძრის სამი კერიდან ორის ლოკალიზება გართულებულია. ადგილზე საერთო ჯამში 250 მეხანძრე-მაშველი, 60 მეტყევე და ასამდე მოხალისე მუშაობს.

ხანძარსაწინააღმდეგო ღონისძიებებს ძნელად მისადგომი რელიეფი ართულებს.

სტიქიასთან ბრძოლის სამუშაოებში დილიდან ჩართული იყო 4 ვერტმფრენი. ორი ქართული და ორი ირანული ბორტი. შებინდების შემდეგ ავიაციამ მუშაობა შეაჩერა.

სტიქიას ცოცხალი ძალა ებრძვის. მეხანძრე-მაშველებს, მეტყევეებსა და მოხალისეებს კოორდინაციას საგანგებო შტაბი უწევს. ადგილზე მუშაობს მოამბის გადამღები ჯგუფი.

მასშტაბური ხანძარსაწინააღმდეგო ოპერაციის დეტალებს მარიამ სეთურიძე მოგვაწვდის.